Аб сустрэчы Прэзідэнта Беларусі А.Лукашэнка з Губернатарам Ленінградскай вобласці А.Драздзенкам

Кіраўнік дзяржавы нагадаў, што ў ходзе папярэдняй сустрэчы з кіраўніком рэгіёна была абазначана мэта – выйсці на запаветны мільярд у гандлі. 

«Для гэтага ў гадавым вылічэнні аб'ёмы паставак давядзецца нарасціць прыкладна пятую частку – 20%. Мяркую, выканальная задача ў цяперашняй сітуацыі, і мільярдам мы дакладна не будзем абмяжоўвацца. Гэта такі ўмоўны арыенцір для нас», – звярнуў увагу беларускі лідар.

«Як вы, Аляксандр Юр'евіч (Драздзенка. – Заўвага), адзначылі ў адным са сваіх выступленняў, традыцыйныя перавагі прыгранічнага з Еўрасаюзам Ленінградскага рэгіёна з 2022 года сталі фактарамі рызыкі. Дзякуй богу, нам гэта вельмі выгадна, і Расіі таксама. Мы больш будзем цяпер глядзець на сябе і думаць, як нам развівацца далей», – сказаў Прэзідэнт.

У сувязі з гэтым Аляксандр Лукашэнка згадаў праведзеную напярэдадні тэлефонную размову з Прэзідэнтам Расіі Уладзімірам Пуціным, у час якой абмяркоўвалася рэалізацыя двух значных праектаў – у галіне сумеснай вытворчасці і абслугоўвання самалётаў і будаўніцтва другой чыгуначнай веткі з Беларусі ў Санкт-Пецярбург і вобласць.

Як расказаў Прэзідэнт Беларусі, у сярэдзіне кастрычніка намечана іх сустрэча ў Кыргызстане (у Бішкеку пройдзе саміт СНД), дзе яны плануюць больш прадметна абмеркаваць гэтыя праекты.

«Размова ішла аб сумеснай вытворчасці самалётаў невялікай умяшчальнасцю, якія вельмі запатрабаваны і патрэбны ў Расійскай Федэрацыі. Як сказаў Прэзідэнт Расіі: ад буйных аэрапортаў да далёкіх пасёлкаў, рэгіёнаў такія самалёты запатрабаваны, тым больш яны могуць ажыццяўляць пасадку на грунт», – растлумачыў Аляксандр Лукашэнка.

Беларусь валодае адпаведнымі кампетэнцыямі, таму Прэзідэнт Расіі прапанаваў гэты самалёт пабудаваць разам з беларускім бокам, а таксама больш інтэнсіўна асвойваць вытворчасць асобных кампанентаў для ІЛ-96 і абслугоўваць іх у Беларусі.

«Мы гэта можам зрабіць. Гэта вельмі вялікі кусок работы», – сказаў Аляксандр Лукашэнка.

Яшчэ адзін праект, які абмеркавалі лідары дзвюх краін, – гэта будаўніцтва другой чыгуначнай веткі ад Беларусі на Санкт-Пецярбург і вобласць для таго, каб была магчымасць перавозіць вялікія аб'ёмы грузаў у расійскія парты і адтуль працаваць на ўвесь свет.

«Вы разумееце, што для нас гэта вельмі важна. Мы займаемся партовым будаўніцтвам там, інфраструктурай. Але слабае месца ў нас – чыгунка», – адзначыў беларускі лідар.

Перспектывы рэалізацыі праектаў, паводле слоў Прэзідэнта, ужо абмяркоўваліся з расійскімі ведамствамі, па іх падрыхтаваны пакет неабходных дакументаў, матэрыялаў, якія будуць перададзены Кіраўніку расійскай дзяржавы.

«А калі б Аляксандр Юр'евіч па–ранейшаму арыентаваўся на суседзяў, на Еўрасаюз, то мы, напэўна, гэтымі пытаннямі яшчэ доўга не займаліся б. Таму не бывае аднабаковых выгад і няўдач. Я думаю, з праблемамі, якія цяпер у нас ёсць (яны вырашаюцца, гэтыя праблемы, мы гэта бачым), мы справімся», – падкрэсліў Аляксандр Лукашэнка.

На яго думку, ленінградцы пры падтрымцы беларусаў паспяхова спраўляюцца з гэтай праблемай. Тэмпы развіцця эканомікі – пераканаўчае таго пацвярджэнне.

«З вашай дапамогай мы пераарыентавалі лагістыку, і нашы вытворцы зноў маюць магчымасці гандляваць у Азіі, Лацінскай Амерыцы, на Блізкім Усходзе, у Афрыцы. Мы будзем гэты напрамак умацоўваць», – запэўніў Прэзідэнт.

«Для многіх заходніх палітыкаў стала сапраўдным адкрыццём, што свет значна шырэйшы за іх вузкія ўяўленні пра яго. Як звычайна, вырашылі па-руску: давай у бойку ўвяжамся, а там будзе відаць. Аказалася, што калі не рускія, то і не атрымаецца», – прывёў метафарычны прыклад Кіраўнік дзяржавы.

Дзякуючы прамысловай кааперацыі Беларусі і Расіі ўдалося максімальна эфектыўна выкарыстоўваць моцныя бакі адзін аднаго для дасягнення тэхналагічнага суверэнітэту, заявіў Прэзідэнт. «Гэта дасць магчымасць не толькі даць адказ на любыя спробы націску Захаду, але і створыць новае, здаровае канкурэнтнае асяроддзе ўнутры нашага саюза (Саюзнай дзяржавы. – Заўвага)», – упэўнены Аляксандр Лукашэнка.

Ён прывёў просты прыклад: нягледзячы на магутнае развіццё АПК як у Беларусі, так і Ленінградскай вобласці, бакі не канкурыруюць, а паспяхова знаходзяць напрамкі, дзе могуць адзін аднаго падтрымліваць.

«Нашы моцныя бакі – вытворчасць сельскагаспадарчых машын і агрэгатаў, зернесушыльных комплексаў, абсталявання для камбікормавых заводаў, выпуску харчовай прадукцыі, насенняводства, шмат іншага», – прадоўжыў Прэзідэнт. Беларусь актыўна дзеліцца з аграрыямі Ленінградскай вобласці сваімі напрацоўкамі, у тым ліку ў галіне ветэрынарыі, дзе зроблены першыя крокі па развіцці супрацоўніцтва.

«Якіх вынікаў удалося дасягнуць? Якія, на ваш погляд, перспектывы яшчэ ёсць у гэтай галіне? І, зразумела, якія праблемы, якія трэба пераадольваць?» – пацікавіўся Аляксандр Лукашэнка. 

Для Беларусі ўяўляюць цікавасць напрацоўкі Ленінградскай вобласці ў племянной жывёлагадоўлі, вытворчасці каштоўных парод рыбы, тэхналогіі работы цяплічных комплексаў. 

«У сваю чаргу аграрыям Ленінградскай вобласці можа быць карысны наш вопыт вырошчвання азімых культур – ячменю і рапсу, – дадаў беларускі лідар. – Прапаную таксама больш дэталёва адпрацаваць пытанні павелічэння паставак беларускай сельгастэхнікі, у тым ліку з прыцягненнем рэгіянальных субсідый, а таксама абсталявання для перапрацоўчай прамысловасці». 

У сувязі з гэтым Аляксандр Лукашэнка згадаў вопыт такога супрацоўніцтва з Кубанню: «Яны зрабілі стаўку на нашу тэхніку, мы адгукаемся. Мы ідзём туды з тэхналогіямі, з людзьмі… Пачыналі са зборачных вытворчасцей, цяпер сумесныя прадпрыемствы арганізавалі, лакалізацыю ўзмацнілі. Тым больш мы можам гэта зрабіць у вас», – заўважыў ён. 

Як важны фактар Прэзідэнт адзначыў прадаўжэнне супрацоўніцтва ў сферы развіцця транспартнай інфраструктуры. Беларускія прадпрыемствы актыўна ўдзельнічаюць у будаўніцтве ў Выбаргскім раёне Высоцкага збожжавага тэрмінала, які будзе мець магутнасці па захоўванні 210 тыс. т збожжа (праектная прапускная здольнасць тэрмінала – 4 млн. т у год). 

«Упэўнены, гэты праект таксама прынясе важкую карысць і нашым сябрам у Лацінскай Амерыцы: Бразіліі, Венесуэле і іншых краінах», – сказаў беларускі лідар. 

Словы ўдзячнасці ён выказаў Аляксандру Драздзенку за прыцягненне айчынных прадпрыемстваў да рэалізацыі важнейшых для Ленінградскай вобласці праграм. Адна з іх – будаўніцтва станцый па водаачыстцы і водападрыхтоўцы. У Ленінградскай вобласці працуе 37 аб'ектаў, пабудаваных пад ключ з выкарыстаннем беларускіх тэхналогій. 

«Мне дакладваюць, што вамі падрыхтавана праграма будаўніцтва больш як 100 такіх аб'ектаў. Да яе фінансавання гатовы падключыцца і наш Банк развіцця», – сказаў Прэзідэнт. 

Сярод праектаў, якія рэалізуе беларускі бок, – будаўніцтва школы на 825 месцаў у Ламаносаўскім раёне. Паводле слоў Аляксандра Лукашэнкі, урад вырашае пытанне аб выдзяленні спецыяльнага экспартнага крэдыту. 

Гаворачы пра новыя напрамкі супрацоўніцтва, Кіраўнік дзяржавы згадаў пра ўдзел беларускіх праектных і будаўніча–мантажных арганізацый у комплекснай мадэрнізацыі аб'ектаў паліўна–энергетычнага комплексу (кацельняў), стварэнне і рэканструкцыю крыніц цеплазабеспячэння муніцыпальных раёнаў вобласці, а таксама пра пастаўку беларускіх будаўнічых матэрыялаў, дарожна–будаўнічай тэхнікі, цэменту, сценавых матэрыялаў, зборных канструкцый, бітуму, абмен вопытам у прымяненні сучасных тэхналогій дарожнага будаўніцтва. 

Аляксандр Лукашэнка прапанаваў не ствараць паралельных (дубліруючых) вытворчасцей, калі ёсць магчымасць экспартаваць тыя ці іншыя тавары з Беларусі. «Мы з вамі заўсёды дамовімся па пастаўках, заўсёды, прытым на працяглую перспектыву. Сёння трэба грошы траціць на самае неабходнае і вам, і нам таксама. Навошта паралельную вытворчасць ствараць? І вось пералічаныя мною напрамкі якраз датычацца гэтага пытання, – растлумачыў беларускі лідар. – Такі ўзаемны абмен прадукцыяй вельмі важны». 

«Можаце на нас разлічваць, калі вам патрэбна будзе нейкая дапамога, і мы можам яе вам аказаць, мы абавязкова гэта зробім, – дадаў Прэзідэнт. – Нам трэба вельмі ўважліва паглядзець, дзе мы можам, дапаўняючы адзін аднаго, сур'ёзна працаваць на вынік для дасягнення той мэты, якую мы абазначылі». 

Назваўшы адносіны з Ленінградскай вобласцю ўзорна–паказальнымі, Кіраўнік беларускай дзяржавы падкрэсліў: «Мы вельмі хацелі б зрабіць у Расіі (у супрацоўніцтве з Расіяй. – Заўвага) перш за ўсё (не ў тым ліку, а перш за ўсё) стаўку на ваш рэгіён».

Аляксандр Лукашэнка выказаў упэўненасць у тым, што з улікам выдатных адносін паміж Беларуссю і Ленінградскай вобласцю, іх эфектыўнасць павінна быць вышэйшая.

«Мы з вамі ведаем, па якіх напрамках працаваць, каб атрымаць сур'ёзны вынік», – звярнуў увагу беларускі лідар. Ён таксама заўважыў, што Аляксандр Драздзенка даволі часта бывае ў нашай краіне і гэта сведчыць аб тым, што ён не лічыць яе чужой.

«За гэта Вам удзячнасць вялікая», – сказаў Кіраўнік дзяржавы, падкрэсліўшы і свае вельмі дружалюбныя адносіны да Ленінградскай вобласці і да яе людзей, гістарычна вельмі блізкіх беларусам.

«У нас і разуменне аб далейшых шляхах развіцця аднолькавае, і планаванне вынікаў – увогуле, погляды ў нас ідэнтычныя. Калі беларусы і ленінградцы пачынаюць нейкую справу, заўсёды яны імкнуцца давесці яе да лагічнага завяршэння і з найлепшымі вынікамі», – заявіў Прэзідэнт.

Кіраўнік расійскага рэгіёна адзначыў, што цяперашні візіт дэлегацыі Ленінградскай вобласці ў Беларусь пачаўся з наведвання мемарыяльнага комплексу «Хатынь». Ён выказаў словы ўдзячнасці за ўсё, што там зроблена за апошні час. «Наша дэлегацыя выйшла вельмі ўражанай. Эмацыянальна, душэўна ўражанай. Для нас гэта ўсё блізка, і настолькі сапраўды ленінградцы і беларусы разам духоўна, ментальна. Гэта ва ўсім праяўляецца», – падкрэсліў Аляксандр Драздзенка.

Аляксандр Драздзенка ўпэўнены, што ў бягучым годзе бакі выйдуць на намечаны раней аб'ём тавараабароту ў эквіваленце $1 млрд, што пацвярджаецца бягучымі паказчыкамі і статыстыкай. «Мы на мільярд выходзім. Ужо ў нас гэтых сумненняў няма. Таму што працэнт прадаўжае расці. І хачу сказаць, што менавіта дзякуючы такому цеснаму супрацоўніцтву ў нас наменклатура толькі за апошні год павялічылася на 70 новых пазіцый. Такога раней не было, каб настолькі хутка расла наменклатура нашых узаемных інтарэсаў. У нас адкрываюцца ўжо кірмашы, магазіны з беларускай прадукцыяй», – адзначыў кіраўнік рэгіёна.

Аляксандр Драздзенка таксама згадзіўся са словамі Прэзідэнта, што няма неабходнасці ствараць дубліруючыя вытворчасці, паколькі бакі могуць гандляваць адзін з адным тым, што ўжо добра ўмеюць вырабляць. Губернатар таксама звярнуў увагу, што Ленінградская вобласць закупляе вялікую колькасць беларускай тэхнікі. 
 

Версія для друку