Аб перагаворах Прэзідэнта Беларусі А.Лукашэнка з Прэзідэнтам Расіі У.Пуціным

Прэзідэнт Беларусі Аляксандр Лукашэнка і Прэзідэнт Расіі Уладзімір Пуцін 13 сакавіка правялі перагаворы ў Крамлі.



У час сустрэчы ў фармаце сам-насам Аляксандр Лукашэнка заявіў аб народнай падтрымцы ў Беларусі курсу на супрацоўніцтва з Расіяй, што ў тым ліку прадэманстравалі і вынікі праведзеных прэзідэнцкіх выбараў.

«Я доўга думаў аб тым, што можна сказаць пра нашы адносіны. Яны сапраўды, як Вы сказалі, выйшлі на вельмі высокі ўзровень. Мы ствараем унікальнае ўтварэнне ў выглядзе Саюзнай дзяржавы, прыкладаў якога не было ў гісторыі. Ідзём непракладзеным шляхам. Гэта ўсё няпроста. Але, як Вы гаварылі, у нас ёсць добрае люстэрка, дзе мы бачым нашы крокі. І гэта эканоміка, гандлёва-эканамічныя адносіны. І кожны год (пры ўсіх праблемах – яны былі і будуць) мы прырастаем. Гэта сведчыць аб тым, што мы рухаемся ў нармальным напрамку», – сказаў Прэзідэнт.

Гаворачы аб прэзідэнцкіх выбарах, што прайшлі ў Беларусі, Аляксандр Лукашэнка звярнуў увагу, што ў ходзе такіх палітычных кампаній заўсёды так ці інакш стаіць пытанне аб пэўным выбары вектара паміж Усходам і Захадам.

«Нашы выбары – гэта заўсёды адзін бок і другі. Другі бок, як у вядомым фільме гаварылі, разбегся. Частка збегла на Захад невялікая. Але ўсё ж у Беларусі яны ёсць, прытаіліся. Недзе нехта маўчыць», – канстатаваў Кіраўнік дзяржавы.

У сувязі з гэтым ён канстатаваў вельмі высокую яўку выбаршчыкаў на праведзеных выбарах і працэнт галасоў, які быў аддадзены ў падтрымку дзеючага Прэзідэнта. «Хоць з усіх бакоў стрымальныя былі фактары. Усё нашых людзей прытрымлівалі. У СМІ (апазіцыйных. – Заўвага) і іншае, каб яны не хадзілі на выбары», – адзначыў Аляксандр Лукашэнка.

Прэзідэнт падкрэсліў, што амаль 87% выбаршчыкаў прагаласавалі ў яго падтрымку. «А гэта ж было галасаванне: «Мы з Расіяй, усходні наш вектар, тут наша калыска або недзе там?» Ну вось адказ. Народ даў адказ. І ў нас гэта пытанне, як галоўнае пытанне, ціха, непублічна, яно заўсёды стаяла. Гэта асаблівасць нашых выбараў усіх. Таму вы ніколькі не сумнявайцеся. Не толькі я, мае калегі – члены Урада, дэпутаты – прыхільнікі самых цесных нашых адносін, – заявіў Кіраўнік дзяржавы. – Мы пацвердзілі гэта ў нашай адзінай барацьбе сённяшняй, вастрыём якой з'яўляецца канфлікт ва Украіне. Мы заўсёды прытрымліваліся такога курсу. І вельмі важна, што народ прадэманстраваў. Нашы людзі цудоўна разумеюць, дзе нашы сябры, а дзе нашы праціўнікі, ворагі і сапернікі».

Аляксандр Лукашэнка падзякаваў калегу за пачатак афіцыйнага візіту. «Патрэбна гэта дэманстрацыя для беларусаў, расіян, што мы разам. Што мы з'яўляемся суверэннымі незалежнымі дзяржавамі, але ў той жа час мы – родныя людзі. Што будзем пашыраць і далей», – сказаў Кіраўнік дзяржавы.

«Паміж намі, я знайшоў на парадак менш праблем, чым праблем, якія існуюць глабальна і нават у нашым рэгіёне. Мы ў гэтым плане паспяхова працуем. Вядома, ёсць пэўныя пытанні. Я думаю, мы іх закранём у больш шырокім складзе, калі спецыялісты будуць. Але мы ведаем гэтыя пытанні», – адзначыў Кіраўнік беларускай дзяржавы.

«Хацелася б, можа, каб мы хутчэй тут рухаліся. Але не заўсёды гэта атрымліваецца. І не толькі таму і не столькі гэта залежыць ад нас з вамі. Гэта залежыць і ад знешніх акалічнасцей. Мы гэта добра разумеем. Усё, за што мы бяромся, мы вырашаем грунтоўна. Як, напрыклад, імпартазамяшчэнне, процістаянне гэтым санкцыям. Усе думалі, што мы ўжо рухнем праз год. Але жывыя-здаровыя. Я ўпэўнены, што мы будзем жыць. Нам трэба крыху больш часу. І, магчыма, больш настойлівасці. Але нам гэтага не пазычаць, у нас гэта ў крыві», – упэўнены беларускі лідар.

Уладзімір Пуцін у сваю чаргу павіншаваў беларускага калегу з перавыбраннем на пасаду Прэзідэнта Беларусі і заўважыў, што краінай для першага візіту стала Расія. «Паважаны Аляксандр Рыгоравіч, вельмі рады Вас бачыць. Вельмі прыемна, што Вы свой першы візіт пасля перавыбрання ў якасці Прэзідэнта Беларусі вырашылі зрабіць менавіта ў Расію», – сказаў ён.

Гэта, паводле слоў Уладзіміра Пуціна, і зразумела, таму што паміж Беларуссю і Расіяй даўно склаліся асаблівыя адносіны – саюзніцкія, братэрскія ў прамым сэнсе слова. «Мы ўвесь час аб гэтым гаворым, але з улікам афіцыйнага характару Вашага візіту не лішнім будзе ўспомніць яшчэ раз. У нас гістарычныя сувязі, роднасныя вузы паміж вялікай колькасцю людзей. У нас сёння развіваюцца адносіны такім чынам, што яны маглі б быць прыкладам для адносін паміж многімі іншымі краінамі і ў сферы эканомікі, і ў сферы забеспячэння бяспекі, і нашага супрацоўніцтва на міжнароднай арэне, перш за ўсё на пляцоўках ААН, у ШАС, дзе Беларусь стала паўнапраўным членам арганізацыі, у БРІКС, дзе Беларусь таксама набыла статус партнёра», – падкрэсліў Прэзідэнт Расіі.

Што датычыцца эканамічнага супрацоўніцтва, то ў гэтай сферы, паводле яго слоў, усё развіваецца самым найлепшым чынам, нягледзячы на розныя складанасці. Беларуска-расійскі тавараабарот за 2024 год, паводле даных беларускага боку, вырас на 6,3% і дасягнуў рэкорднага ўзроўню $51,8 млрд.
«Прычым работа ідзе як у звычайным рэжыме, так і на перспектыву. Мы адкрываем новыя напрамкі ўзаемадзеяння. З Вашай падачы мы пачалі прапрацоўку, і актыўна, пазітыўна ідзе работа, напрыклад, у сферы авіябудавання», – заўважыў Уладзімір Пуцін.

Акрамя таго, развіваюцца двухбаковыя адносіны ў сферы культуры, адукацыі, спорту. У гэтым годзе, напрыклад, у Беларусі пройдуць Дні расійскай культуры і Дні расійскага кіно. Звыш 80 суб'ектаў Расіі падтрымліваюць адносіны на рэгіянальным узроўні са сваімі партнёрамі ў рэгіёнах Беларусі. «Увогуле, практычна па ўсіх напрамках ідзе актыўная работа», – абагульніў Прэзідэнт РФ.

Ён таксама звярнуў увагу на дзелавы, насычаны характар цяперашняга візіту Кіраўніка беларускай дзяржавы ў Расію. Акрамя шэрага мерапрыемстваў, у парадку дня таксама падпісанне і абмен міжведамаснымі дакументамі, якія, паводле слоў Прэзідэнта Расіі, будуць дапамагаць рабоце на ўзроўні канкрэтных прадпрыемстваў, галін. «Упэўнены, што і сённяшні візіт пройдзе на добрым узроўні з добрым вынікам», – падкрэсліў Уладзімір Пуцін.

Прэзідэнт Расіі таксама аднавіў сваё запрашэнне Аляксандру Лукашэнку наведаць парад у Маскве да 80-годдзя Перамогі 9 мая бягучага года. Акрамя таго, ён нагадаў аб запланаваным правядзенні ў Валгаградзе маштабнага форуму, прысвечанага 80-годдзю заканчэння Вялікай Айчыннай вайны, і запрасіў беларускі бок да ўдзелу ў гэтым мерапрыемстве.

Тэт-а-тэт прэзідэнты размаўлялі крыху больш за гадзіну. Потым пытанні парадку дня абмеркавалі ў пашыраным складзе з удзелам членаў дэлегацый. Гэты сегмент перагавораў прайшоў у фармаце абеду.

Прэзідэнты Беларусі і Расіі Аляксандр Лукашэнка і Уладзімір Пуцін па выніках перагавораў у Маскве падпісалі сумесную заяву.

У дакуменце адзначаецца, што перагаворы прайшлі ў атмасферы дружбы, узаемаразумення і даверу. Лідары краін пацвердзілі саюзніцкі характар адносін паміж Беларуссю і Расіяй і нязменнасць курсу на пашырэнне стратэгічнага партнёрства ва ўсіх сферах. У сумеснай заяве таксама выказана пазіцыя бакоў па шэрагу ключавых пытанняў ва ўзаемадзеянні на міжнароднай арэне.

Адбыўся абмен граматамі аб ратыфікацыі Дагавора аб гарантыях бяспекі ў рамках Саюзнай дзяржавы, які пасля гэтага ўступіў у сілу.

Прэзідэнты падпісалі Пагадненне аб мерах па ўзаемнай абароне грамадзян ад неабгрунтаванага праследавання замежнымі дзяржавамі і міжнароднымі органамі юстыцыі.

Кіраўнікі дзяржаў таксама падпісалі пратакол аб унясенні змяненняў у двухбаковы дагавор аб роўных правах грамадзян ад 25 снежня 1998 года. Дакументам замацоўваецца магчымасць на ўзаемнай аснове беларускім і расійскім грамадзянам, якія пастаянна пражываюць на тэрыторыі іншай дзяржавы, удзельнічаць у мясцовых выбарах — выбіраць і быць выбраным у органы мясцовага самакіравання. Грамадзяне Расіі, якія пастаянна пражываюць у Беларусі, і да гэтага мелі такую магчымасць, а цяпер аналагічныя правы ў Расіі атрымалі і грамадзяне Беларусі.

У рамках візіту таксама падпісаны шэраг дакументаў на ўзроўні ўрадаў і ведамстваў дзвюх краін.

Аляксандр Лукашэнка падзякаваў Прэзідэнту Расіі Уладзіміру Пуціну за цёплы прыём і запрасіў яго наведаць Беларусь з візітам.

У час сустрэчы з прадстаўнікамі СМІ Прэзідэнт Расіі Уладзімір Пуцін адзначыў: «Гэта першы замежны візіт Аляксандра Рыгоравіча пасля перавыбрання на пасаду Прэзідэнта Беларусі. Мы такі крок высока ацэньваем. Тым самым падкрэсліваецца асаблівы характар адносін паміж дзвюма нашымі братэрскімі краінамі».

Ён канстатаваў, што Беларусь і Расія не толькі бліжэйшыя суседзі, але і надзейныя саюзнікі, сапраўдныя стратэгічныя саюзнікі і сапраўдныя сябры. «У аснове нашага супрацоўніцтва – непахісныя прынцыпы ўзаемнай павагі і ўліку інтарэсаў адзін аднаго, а таксама шматвяковая сумесная гісторыя, існуючыя роднасныя сувязі паміж многімі расіянамі і беларусамі, прыхільнасць да агульных маральных і духоўных каштоўнасцей. Менавіта ў такой традыцыйна дружалюбнай, дзелавой і канструктыўнай атмасферы прайшлі нашы сённяшнія перагаворы», – сказаў Уладзімір Пуцін.

Паводле яго слоў, на перагаворах падрабязна абмеркаваны практычна ўсе асноўныя пытанні двухбаковага ўзаемадзеяння ў эканоміцы, культурна-інтэрнэт-гуманітарнай сферы, у галіне бяспекі і абароны. Прэзідэнты абмяняліся думкамі па актуальных міжнародных пытаннях.

Уладзімір Пуцін падкрэсліў, што ў падпісанай прэзідэнтамі па выніках перагавораў заяве выразна пацверджаны настрой на далейшае развіццё шматпланавых двухбаковых сувязей. «Расія і Беларусь прадоўжаць сумесна будаваць Саюзную дзяржаву, паглыбляць інтэграцыю, садзейнічаючы забеспячэнню ўстойлівага эканамічнага росту, павышэнню ўзроўню жыцця і дабрабыту грамадзян дзвюх нашых краін».

Ён таксама адзначыў рэкордны ўзровень тавараабароту паміж Беларуссю і Расіяй, дасягнуты ў 2024 годзе. «Звыш 90% усіх плацяжоў у расійска-беларускіх камерцыйных аперацыях прыпадае на нашы нацыянальныя валюты. Тым самым узаемны гандаль і інвестыцыі абаронены ад уплыву трэціх краін і негатыўных тэндэнцый на сусветных рынках», – звярнуў увагу Прэзідэнт Расіі.

Сярод галін, дзе ёсць нядрэнныя перспектывы для развіцця двухбаковага супрацоўніцтва, Уладзімір Пуцін назваў вытворчасць аўтамабіляў і станкоў, сельгасмашынабудаванне, мікраэлектроніку, грамадзянскую авіяцыю, энергетыку.

«Бачым перспектывы паглыблення партнёрства і ў іншых высокатэхналагічных галінах. Размова, у прыватнасці, ідзе аб узаемадзеянні па тэматыцы развіцця штучнага інтэлекту, апрацоўкі вялікіх даных, воблачных вылічэнняў, а таксама стварэння паўнацэнных лічбавых экасістэм», – пералічыў ён.

Аляксандр Лукашэнка адзначыў, што перагаворы з Прэзідэнтам Расіі, як заўсёды, былі насычанымі і плённымі. «Мы правялі толькі трэць нашых перагавораў. Мы прадоўжым заўтра, калі трэба, і паслязаўтра нашы перагаворы, каб падумаць аб перспектывах. Іх трэба вызначаць. Час ідзе хутка і ставіць перад намі нямала пытанняў», – сказаў ён.

Бакі яшчэ раз разгледзелі асноўныя напрамкі развіцця супрацоўніцтва Беларусі і Расіі, прыярытэты Саюзнай дзяржавы на бліжэйшую і сярэднетэрміновую перспектыву. Адбыўся абмен думкамі і наконт бягучай міжнароднай сітуацыі – у глабальным і рэгіянальным разрэзе. Бакі пацвердзілі актуальнасць падпісаных у снежні мінулага года Дагавора аб гарантыях бяспекі ў рамках Саюзнай дзяржавы і Канцэпцыі бяспекі Саюзнай дзяржавы.

На перагаворах таксама абмеркаваны перспектывы ўзаемадзеяння ў рамках ЕАЭС, дзе Беларусь старшынствуе ў гэтым годзе, СНД, АДКБ, ШАС, БРІКС у духу канцэпцыі Вялікага Еўразійскага партнёрства, або інтэграцыі інтэграцый.

Аляксандр Лукашэнка падзякаваў расійскаму калегу за ўсялякую падтрымку ўступлення Беларусі ў ШАС і атрымання статусу партнёра ў БРІКС.

«Гаварылі і аб перспектывах вяртання да нармальнага, цывілізаванага дыялогу на міжнародных пляцоўках па шэрагу актуальных тэм глабальнага характару», – адзначыў кіраўнік дзяржавы.

Ён расказаў, што на перагаворах бакі не абмінулі ўвагай і новую сітуацыю ў пытанні ўрэгулявання канфлікту ва Украіне. «Нам асабліва на штосьці разлічваць вялікае не трэба ў гэтай сітуацыі. Трэба верыць фактам. Розныя заявы, абяцанні – гэта пакуль заявы і абяцанні», – заўважыў беларускі лідар.
«Таксама бачым некаторыя пазітыўныя тэндэнцыі ў геапалітычных раскладах, але яны пакуль не сталі глабальнымі трэндамі. Незаконныя эканамічныя санкцыі шэрага дзяржаў нікуды не зніклі», – канстатаваў Кіраўнік дзяржавы.

Разам з тым прэзідэнты сышліся на думцы, што гэтыя санкцыі ў нечым нават дапамаглі ў плане ўласнага развіцця.

«Націск на Беларусь і Расію не слабее. Хоць ужо ўсім зразумела, што гэтыя абмежаванні больш б'юць па тых краінах, якія іх і ўвялі, – заўважыў Аляксандр Лукашэнка. – Ну і нам далі магчымасць сур'ёзна падумаць аб перспектывах нашага развіцця і пераканалі нас у тым, што праз пэўны час мы пераадолеем гэты націск поўнасцю. Калі б не было гэтых выпрабаванняў, іх варта было б прыдумаць. Яны прымусілі нас сур'ёзна задумацца аб самадастатковасці, важнасці апоры на ўласныя сілы, харчовай бяспецы і тэхналагічным суверэнітэце».

«Мы вельмі высока цэнім вашу падтрымку, якая адкрыла нам доступ да вялікага расійскага рынку, дапамагла пераарыентаваць лагістыку таварных патокаў. Поўнасцю мы пераарыентаваліся. Сёння работа ў гэтым напрамку прадаўжаецца», – дадаў Аляксандр Лукашэнка.

«Будзем рады дапамагчы ў рэалізацыі новых амбіцыйных нацыянальных праектаў», – сказаў Кіраўнік дзяржавы.

Адзін з прыкладаў – супрацоўніцтва ў сферы вытворчасці беспілотнікаў, што абмяркоўвалася нядаўна разам з расійскімі спецыялістамі ў Мінску. Дасягнута дамоўленасць, і гэта адобрана Прэзідэнтам Расіі, аб будаўніцтве завода па вытворчасці беспілотных авіяцыйных сістэм. «Значыць, мы можам усё. І для гэтага трэба не шмат часу», – адзначыў Аляксандр Лукашэнка.

«Разам з Прэзідэнтам Расіі думаем ужо не толькі аб аднаўленчым росце і імпартазамяшчэнні, але і аб апераджальным развіцці. Нешта пачалі рабіць па асобных напрамках. Беларусі і Расіі патрэбны тэхналагічны прарыў у імя будучыні нашых краін і народаў. Усё неабходнае для гэтага ў нас ёсць. Нават больш, чым трэба», – сказаў Прэзідэнт.

Кіраўнік дзяржавы таксама адзначыў наяўнасць вялікага патэнцыялу для развіцця супрацоўніцтва ў транспартнай сферы. «Настаў час сур'ёзна падумаць над больш эфектыўным яго выкарыстаннем. Перш за ўсё магчымасцей чыгуначнага транспарту», – заявіў Аляксандр Лукашэнка.

У гэтым плане Кіраўнік дзяржавы нагадаў аб прапанове пабудаваць высакаскорасную дарогу ад Масквы да Мінска або нават да Брэста.

Беларусь і Расія, адзначыў Аляксандр Лукашэнка, таксама цесна ўзаемадзейнічаюць па імпартазамяшчэнні. Беларускія кампаненты і вузлы працуюць у аўтамабілях і самалётах, што збіраюцца ў Расіі, а айчынныя грузавікі і самазвалы паспяхова замянілі заходнія аналагі ў кар'ерах і на вуліцах гарадоў. Беларускія прадукты харчавання, абутак, адзенне добра вядомы пакупнікам як у Смаленску, так і на Сахаліне.

Гаворачы аб маючых адбыцца мерапрыемствах, прысвечаных 80-годдзю Вялікай Перамогі, Аляксандр Лукашэнка заявіў, што для беларусаў вялікі гонар прыняць удзел 9 мая ў юбілейным Парадзе Перамогі на Краснай плошчы.

«У нашых краін шмат сумесных планаў і праектаў на бягучы год. Зразумела, найважнейшы з іх – гэта святкаванне 80-годдзя Вялікай Перамогі над фашызмам, – сказаў кіраўнік дзяржавы. – Вам, расіянам, дзякуй за тое, што вы ідзяце ў авангардзе гэтага працэсу. Без вас цяжка было б адстаяць тую Вялікую Перамогу, якой мы сёння ганарымся. Для нас, беларусаў, вялікі гонар прыняць удзел у юбілейным Парадзе Перамогі на Краснай плошчы ў Маскве 9 мая 2025 года».

«Мы памятаем і шануем гераічны подзвіг савецкага народа, нашых бацькоў, дзядоў і прадзедаў. Галоўнае сёння – быць дастойнымі іх памяці, не дапусціць рэабілітацыі нацызму і перапісвання гісторыі», – падкрэсліў Аляксандр Лукашэнка.

«Дзякуючы паслядоўнай, узважанай і адказнай знешняй палітыцы Беларусь і Расія сёння знаходзяцца ў авангардзе барацьбы за справядлівае светаўладкаванне. І не першы год мы гэта робім. Нашы краіны могуць і павінны выступаць арыенцірам для партнёраў у вырашэнні складаных праблем сучаснасці, захаванні і абароне агульных каштоўнасцей, узаемадапамозе ў рэалізацыі нацыянальных інтарэсаў на прынцыпах раўнапраўя і павагі», – сказаў Прэзідэнт.

«Мы дамовіліся з Прэзідэнтам Расіі, што мы пераадолеем усё. Мы зробім усё для таго, каб нашы народы былі не горшымі — лепшымі народамі ў свеце. Мы нічога чужога не хочам, але цвёрда ўмовіліся: сваё не аддадзім. На гэтым стаялі і будзем стаяць», – рэзюмаваў беларускі лідар.

Прэзідэнты пасля заяў адказалі на шэраг пытанняў ад журналістаў.

Гаворачы аб магчымасці ўрэгулявання канфлікту ва Украіне, Аляксандр Лукашэнка заявіў, што ўкраінцам даўно трэба было спыніць усялякі агонь і сесці за стол перагавораў.

«У нас адзіная пазіцыя з Расійскай Федэрацыяй. Была даўно і ёсць цяпер. Усе дамоўленасці, якія ў тым ліку датычацца канфлікту ва Украіне, мы свята выконвалі перад нашымі саюзнікамі і сябрамі. Мы гэтай пазіцыі будзем прытрымлівацца і цяпер, – адзначыў Кіраўнік дзяржавы. – Не Расія і не Беларусь былі асноўнымі прычынамі таго, што адбываецца там».

«Украінцам даўно трэба было спыніць усялякі агонь і сесці за стол перагавораў», – падкрэсліў беларускі лідар.

Ён нагадаў, што ў самым пачатку канфлікту заклікаў дамовіцца, а не ваяваць. У тым ліку гаварыў аб гэтым з Уладзімірам Зяленскім, якога папярэджваў аб адказнасці за вайну на тэрыторыі Украіны. «І потым яму сказаў: «Запомні (гэта класіка гісторыі): заўтра ў Амерыцы памяняецца кіраўніцтва, і дзе будзеш ты? Слухайце, як у ваду глядзеў!» – заявіў Прэзідэнт.

Кіраўнік дзяржавы адзначыў, што заўсёды гаворыць заходнікам аб тым, што менавіта яны падбілі «гэтага нявопытнага хлопца» да вайны.

«Хоць пачыналася ўсё з Парашэнкі (экс-прэзідэнт Украіны Пётр Парашэнка. – Заўвага). Яму тады пасля падпісання Мінскіх дамоўленасцей усе карты ў рукі. Козыры ўсе былі ў яго: давай, спыняй. І не было б гэтага. І па Данбасе дамовіліся б. Упэўнены, і той жа Данбас быў бы ў складзе Украіны», – сказаў беларускі лідар.

Аляксандр Лукашэнка заявіў, што ў гэтай сітуацыі, калі аб Зяленскага ўсюды і фактычна ў Белым доме выцерлі ногі, яму трэба было б «паварушыць мазгамі», сесці і дамовіцца разам у рамках трох славянскіх народаў. «Вось паглядзіце: ніхто Украіне дапамагаць (на Захадзе. – Заўвага) не будзе. Што, у пачатку вайны па рэдказямельных металах ставілася пытанне амерыканцамі? Не. А цяпер паставілі. І чарназёмы павязуць, і рэдказямельныя матэрыялы, і дай бог, каб усё астатняе не вывезлі. Таму ён (Зяленскі. – Заўвага) яшчэ сюды вернецца. Не ён, дык новы, іншы Прэзідэнт. І будзе абапірацца тут на нашы ўнутраныя сілы», – сказаў Прэзідэнт.

«Некаму хочацца, каб мы забівалі адзін аднаго. Мы гэта разумеем. Другі бок – не. Таму няхай думаюць. Наша справа справядлівая», – дадаў беларускі лідар.

«Калі Расія дамовіцца з ЗША – «труба» Еўропе і Украіне разам узятым. У перагаворным працэсе Расіі і ЗША, у іх руках сёння знаходзіцца лёс гэтай Еўропы, якая паводзіла і паводзіць сябе дагэтуль недальнабачна», – заявіў Кіраўнік беларускай дзяржавы.

«Але самае галоўнае – чарговы раз паабяцаўшы, абвесці нас вакол пальца не атрымаецца. Мы ведаем свае мэты, свае інтарэсы», – дадаў Аляксандр Лукашэнка.

У сваю чаргу Уладзімір Пуцін сказаў: «Хацеў бы дадаць да таго, што сказаў Аляксандр Рыгоравіч. Наконт трубы для Еўропы, калі ЗША і Расія аб нечым дамовяцца. То так, сапраўды, калі, скажам, ЗША і Расія дамовяцца аб супрацоўніцтве ў галіне энергетыкі, то газавая труба для Еўропы можа быць забяспечана. І гэта пойдзе на карысць Еўропе, якая можа атрымліваць танны расійскі газ».

Закранаючы тэму аднаўлення супрацоўніцтва з заходнімі партнёрамі ў эканоміцы і іншых сферах, Аляксандр Лукашэнка заявіў, што гэта магчыма з улікам новых умоў і рэальнай сітуацыі на зямлі.

Кіраўнік беларускай дзяржавы ў гэтым пытанні правёў паралелі з пазіцыяй Прэзідэнта Расіі па перагаворах з Украінай. «Неяк сказаў (Уладзімір Пуцін. – Заўвага), што мы гатовы з Украінай дамаўляцца, але каб усе разумелі, і ўкраінцы, што мы да перагавораў вяртаемся праз тры гады з улікам сітуацыі на зямлі. Разумна, усё правільна, – працытаваў калегу Аляксандр Лукашэнка. – Можна перанесці гэты ваенны тэзіс на наша грамадзянскае поле. Вяртаюцца (заходнія партнёры. – Заўвага) – вось пэўныя ўмовы. Шмат часу мінула. І ўмовы змяніліся, і сітуацыя змянілася. Калі ласка, прыходзьце. Але, як сказаў Уладзімір Уладзіміравіч, мы навучыліся шмат чаму за гэты час. Будзем рабіць з гэтага адпаведныя высновы».

«Гэта значыць сітуацыя змянілася. Мы ведаем, чым адказаць. Трэба разумець, што гэтыя тры гады мы (знаходзіліся. – Заўвага) пад жорсткім прэсам, а прэс заўсёды садзейнічае мабілізацыі. Мабілізаваўшыся, вельмі шмат зрабілі. Таму мы маем намер ісці сваім шляхам і выкарыстоўваць толькі тое, што нам трэба. Думаю, што гэта будзе правільна. Мы шмат разоў з Уладзімірам Уладзіміравічам на гэту тэму ў такім сэнсе гаварылі. Ніхто не закрываецца, мы вас прымем тут пад нашы новыя ўмовы з улікам сітуацыі на зямлі і возьмем толькі тое, што нам трэба», – падкрэсліў Прэзідэнт.

«Улічваць інтарэсы Беларусі – поўнасцю адпавядае нацыянальным інтарэсам Расіі», – падкрэсліў расійскі лідар.

«Інтарэсы Беларусі пры нашых узаемаадносінах з кім бы там ні было – і з нашымі партнёрамі за акіянам, і бліжэйшымі нашымі суседзямі – улічваюцца заўсёды. Мы ў рамках Саюзнай дзяржавы зыходзім з таго, што ў нас агульная канцэпцыя знешнепалітычнай дзейнасці. Мы працуем цесна ў рамках ЕАЭС, у нас вельмі глыбокая кааперацыя ў сферы эканомікі, рэальнай вытворчасці. Таму не ўлічваць узаемныя інтарэсы мы проста не можам», – сказаў Уладзімір Пуцін.

Ён растлумачыў, што любы крок Расіі на любым з гэтых напрамкаў так ці інакш уплывае і на Расію, і на Беларусь.

Аляксандр Лукашэнка растлумачыў, што гэта пытанне з'явілася з падачы беларускіх збеглых за мяжой. Маўляў, Расія з ЗША дамовяцца, а «Лукашэнку туды і не пусцяць, і інтарэсы Беларусі не будуць улічаны». «Па-першае, я, адказваючы на гэта, сказаў, што я асабліва не рвуся нікуды. А, па-другое, там (на перагаворах. – Заўвага) будзе блізкі нам чалавек, наш партнёр – Расійская Федэрацыя. І яна ведае нашы інтарэсы і ні ў якім разе нікому не ўступіць і не адступіцца ад нашых інтарэсаў. Дакладна як вы і сказалі. Таму калі нехта спадзяецца, што перагаворы Расіі і ЗША па Украіне або Расіі і Захаду нанясуць нейкую шкоду суседняй Беларусі, гэта абсалютна не так. Уладзімір Уладзіміравіч гэта пацвердзіў. Дадаць няма чаго».

«Не ўлічваць інтарэсы Беларусі для нас шкодна самім. Вось у чым уся справа. Таму пытанне, шчыра кажучы, надуманае», – дадаў Уладзімір Пуцін.

Адно з пытанняў ад журналістаў датычылася эканамічнай інтэграцыі Расіі і Беларусі, наколькі выкананы 28 саюзных праграм і як праходзіць рэалізацыя намечанага на 2024-2026 гады.

«Усе 28 праграм, якія былі намечаны, выкананы на 100%. Тое, што мы планавалі на 2024-2026 гады, выканана звыш, чым на 26%. Я асабіста задаволены тым, як ідзе гэта работа. Урады працуюць вельмі напружана, інтэнсіўна і рэзультатыўна», – заявіў Уладзімір Пуцін.

Ён адзначыў, што час ад часу разам з Прэзідэнтам Беларусі яму даводзіцца ў гэтым працэсе прымаць удзел, каб выключыць асобныя няўзгодненасці паміж рознымі ведамствамі. Гэта адбываецца ў рабочым парадку, і заўсёды знаходзяцца кампрамісныя рашэнні.

«Дадаць нічога не магу. Я вельмі рады, што Уладзімір Уладзіміравіч задаволены рэалізацыяй гэтых праграм. Мы дакладна дамовіліся тэхналагічна – тое, што ўрады не змогуць выпрацаваць на сваім узроўні, уносьце на наш узровень для ўзгаднення. Сёння было такіх два-тры пытанні ў ходзе перагавораў. Мы ўзгаднілі іх, урады працуюць. Таму я задаволены гэтым ходам», – сказаў па гэтым пытанні Аляксандр Лукашэнка.

Яшчэ да пачатку перагавораў, адразу пасля прыбыцця ў Крэмль, Кіраўнік беларускай дзяржавы адказаў на пытанні прадстаўнікоў СМІ.

На пытанне, што будзе на перагаворах, Аляксандр Лукашэнка сказаў: «Усё будзе. Мы ўсё адкладалі, адкладалі. Вы ж бачыце, што мы пару месяцаў ці тры ўжо месяцы не сустракаліся. Таму мы ўсё збіралі пытанні, дамаўляліся, што сёння абмяркуем», – сказаў Прэзідэнт.

Ён падкрэсліў, што якіх-небудзь глабальных унутрыпалітычных, эканамічных пытанняў ва ўзаемаадносінах паміж Беларуссю і Расіяй няма. «Яны абмяркоўваліся ўжо не адзін раз. Мы шмат робім у гэтым напрамку. Па адзіных рынках газу, нафты, электраэнергіі прынялі рашэнне. Іх няшмат – гэтых пытанняў. Імпартазамяшчэнне яшчэ», – адзначыў Аляксандр Лукашэнка.

Што датычыцца знешнепалітычнага парадку дня, шмат пытанняў назбіралася і глабальных, і рэгіянальных. «Нам у глабальныя пытанні лезці няма чаго. Я думаю, расіяне разбяруцца і за нас, і за сябе на глабальным узроўні», – сказаў ён.

Адказваючы на пытанне, ці плануюцца ў яго кантакты з амерыканцамі, Аляксандр Лукашэнка сказаў: «Не, я не збіраюся з імі кантактаваць. У дадзеным выпадку нам чаго сустракацца? Нам няма ніякага сэнсу. Мы ўзгоднім цяпер пазіцыю». Разам з тым, адзначыў Прэзідэнт, кантакты з ЗША па лініі вызначаных ведамстваў заўсёды падтрымліваліся.

Што датычыцца перагавораў з Уладзімірам Пуціным, Кіраўнік дзяржавы звярнуў увагу на наяўнасць рэгіянальных пытанняў, накшталт украінскай праблемы або ўзаемаадносін з Еўропай, Захадам. «Гэтыя пытанні ёсць. Яшчэ раз трэба абмеркаваць з улікам апошніх падзей нашы намеры з Расійскай Федэрацыяй, сінхранізацыю нашых дзеянняў. Гэта будзе. Таму мы абмяркуем усе пытанні», – расказаў Аляксандр Лукашэнка.

Ён адзначыў, што вялікая ўвага ў цэлым удзяляецца менавіта пытанням эканомікі. «Але мы разбяромся з эканомікай. У нас ёсць усё для таго, каб нармальна жыць. Багата не будзем гэты час жыць, але нармальна будзем жыць. Там (ва Украіне. – Заўвага) няма нічога, і Еўропа ім не дапаможа», – заўважыў Аляксандр Лукашэнка.

Аляксандр Лукашэнка пракаменціраваў прапанову з боку ЗША аб 30-дзённым перамір'і ва Украіне.

Адказваючы на пытанне, ці не хітрасць гэта, Прэзідэнт сказаў: «Не, яны ўжо нас не падловяць. І Расію тым больш. Увесь жа час хітрыкі ды хітрыкі. То падманулі, то яшчэ што. Пара ўжо нам галавой думаць. Сёння-заўтра Уладзімір Уладзіміравіч будзе размаўляць з прадстаўнікамі Трампа на гэту тэму. Там жа мноства пытанняў, акрамя 30-дзённага перыяду. Гэта трэба ў цэлым, пакетам узважваць і прымаць адпавядае рашэнне. Не, гэта не хітрасць, і не будзе хітрасцю. Не будзе, таму што мы ведаем, што нам трэба. Яны ведаюць, чаго мы хочам. Таму хітрасцю не будзе. Потым, каб гэта не было хітрасцю, трэба з другога боку абстаўляцца нармальна. Калі гэтае перамір'е, значыць, усё замерла і ніякага руху. Але на гэта хутчэй за ўсё ўкраінцы не пагодзяцца», – сказаў Кіраўнік дзяржавы.

«Абсалютна дакладна магу сказаць, што ў амерыканцаў няма ніякага плана па канфлікце ва Украіне. Абсалютна няма. Яны што робяць (можа, так, агульныя рысы, спыніць вайну і іншае) – яны зандзіруюць глебу. Мы пра гэта сёння пагаворым. Уладзімір Уладзіміравіч мне раскажа аб тым, што гаварылі ў Саудаўскай Аравіі і іншае. Яны зандзіруюць глебу: а што гэтыя хочуць, што гэтыя? На гэтых націснем – можна націснуць. На гэтых не націснеш», – сказаў Аляксандр Лукашэнка.

«Што, на Расію… (можна націснуць. – Заўвага)? Мы даўно абмяркоўвалі гэту праблему. Што, Дональд прыйдзе і кулаком стукне – усё. Або санкцыі ўвядуць? Дык ужо ўвялі супраць нас столькі санкцый, што ўжо далей няма куды іх уводзіць, – заўважыў беларускі лідар. – Таму націснулі на Украіну, і ёй што – дзявацца няма куды. Пагадзіліся – 30 дзён, дык 30 дзён. Яны і кажуць, што згодныя на 30 дзён. Расіяне, калі гэтыя 30 дзён (калі будзе ўстаноўлена перамір'е. – Заўвага), ну ўсё роўна эканоміка будзе працаваць, ВПК будзе працаваць, яны будуць вырабляць узбраенні і іншае. Ну добра, на фронт не павязём, складзіруем гэта ўсё. А ва Украіне руху не павінна быць ніякага. Таму што яны ж з-за мяжы перакідваюць узбраенні. Як толькі заўважылі – усё, парушэнне».

Аляксандр Лукашэнка лічыць, што Украіна можа з гэтым і не пагадзіцца: «Яны думаюць, што мы адмовімся – расіяне адмовяцца ад гэтага. І ў іх будзе гэты козыр, пра які гаварыў Трамп, г.зн. нам спяшацца не трэба».

Прэзідэнт у размове з журналістамі параіў не ісці на хітрыкі Дональда Трампа: «Таму што ён у гэтых адносінах ваш чалавек – ён медыйны, ён можа заявы рабіць – раніцай адна, вечарам – іншая. І лёгка ўвесці нас, вас у зман. Таму мая вам парада: толькі факты! А факты сёння такія, што заўтра-паслязаўтра Курскую вобласць вызваляць наогул».

Аляксандр Лукашэнка таксама заявіў, што для ўкраінцаў цяпер дрэнна складваецца абстаноўка на фронце, у тым ліку ў раёне Пакроўска.

Адказваючы на пытанне, што сёння трэба, каб перагаворы па Украіне сапраўды пачаліся, Прэзідэнт сказаў: «Шчыра кажучы, трэба, каб расіяне згадзіліся. Ім складана цяпер згадзіцца па прычыне таго, што на фронце ў іх лягчэй. Таму ў іх вялікія козыры, як Трамп гаварыў, у руках».

«Вось калі яны гэтыя козыры прыберагуць, а не дастануць і не пачнуць у гэтай карцёжнай гульні выйграваць, тады дамовімся», – дадаў Кіраўнік дзяржавы.

Каменціруючы па просьбе журналістаў паездку Прэзідэнта Расіі Уладзіміра Пуціна напярэдадні ў Курскую вобласць і поспехі расійскіх войскаў на гэтым напрамку, Кіраўнік дзяржавы сказаў: «Малайчына. Што вы думаеце, галоўнакамандуючы проста так ездзіць? Калі прыехаў, заўтра, вобразна кажучы, трэба поўнасцю вызваляць усю тэрыторыю. Ну некалькі дзён, і яна будзе вызвалена, наколькі я разумею».

У час размовы Кіраўнік дзяржавы расказаў журналістам, што найноўшага расійскага ракетнага комплексу «Арэшнік» у Беларусі пакуль няма.

«Яшчэ няма «Арэшніка». Працуем. Але калі я паглыбіўся ў гэту праблему (Уладзімір Уладзіміравіч мяне інфармаваў), аказалася, што, акрамя ракеты, гэта ўсё трэба вырабляць. І мы гэта робім у Беларусі. Таму мы працуем над гэтым. Некалькі пускавых установак, якія для «Арэшніка» прызначаны, – мы сёння ўжо фактычна заканчваем выраб. Ад старэйшага брата (Расіі. – Заўвага) ракета патрэбна будзе», – расказаў Кіраўнік дзяржавы.

Аляксандр Лукашэнка таксама пракаменціраваў прапанаваны план кіраўніка Еўракамісіі Урсулы фон дэр Ляен аб пераўзбраенні Еўропы коштам 800 млрд. еўра, а таксама прапанаваны Прэзідэнтам Францыі Эмануэлем Макронам «ядзерны парасон» для саюзнікаў у ЕС.

«Ім бы гэты «парасон» трэба над Францыяй не страціць. А не тое, што яны гэты «парасон» над усёй Еўропай будуць трымаць. Гэта па-першае. Па-другое, яны няхай «парасон» свой падымуць хаця б над Германіяй. Або, вобразна кажучы, падзеляцца ядзернай зброяй з Германіяй – вечным гістарычным сваім ворагам. Нібыта цяпер замірыліся. Хто яго ведае… У іх прэтэнзій адзін да аднаго каласальнае мноства. У палякаў з немцамі, ведаеце… Там супярэчнасцей шмат», – сказаў Кіраўнік дзяржавы.

Што датычыцца плана пераўзбраення, Аляксандр Лукашэнка заўважыў: «Няхай яны яшчэ дамовяцца аб 800 мільярдах і падумаюць, дзе яны возьмуць гэтыя 800 мільярдаў».

«Ёсць іншы шлях. Абсалютна адкрыты, сумленны, мірны шлях. Да гэтага падштурхоўвае і канфлікт ва Украіне. Хопіць, наваяваліся, давайце ўжо жыць дружна і выбудоўваць нармальную палітыку, – заклікаў беларускі лідар. – А потым, вы ж бачыце, самае галоўнае – народы там (у Еўрасаюзе. – Заўвага) узняліся. Яны ж прывыклі жыць добра, у тым ліку і за кошт нас, асабліва Расіі – танныя рэсурсы. За кошт гэтага прыбытак добры. Усе прывыклі добра жыць, а тут гэтага няма».

«Таму Урсула, напэўна, ні разу не бачыла не тое што сучасныя сродкі паражэння – ракеты і іншае, – яна пісталета нармальнага не бачыла, а ўжо мысліць глабальна ў плане ўзбраенняў, стварэння еўрапейскай арміі», – заўважыў Прэзідэнт.

«Ну і Дональд жа (Прэзідэнт ЗША Дональд Трамп. – Заўвага), вы бачыце, якую пазіцыю заняў. Так і хочацца сказаць: хто ім дасць гэта зрабіць?» – рэзюмаваў Аляксандр Лукашэнка.

Версія для друку