Аб рабочай паездцы Пасла ў Расіі ў Ліпецкую вобласць
14.11.2025 г.Надзвычайны Паўнамоцны Пасол Рэспублікі Беларусь у Расійскай Федэрацыі Аляксандр Рагожнік у рамках рабочага візіту ў Ліпецкую вобласць сустрэўся з Губернатарам рэгіёну Ігарам Артамонавым.
На перагаворах абмяркоўваліся пытанні ўдзелу Беларусі ў праектах па будаўніцтве ў рэгіёне жылля, сацыяльных аб'ектаў і дарог, пастаўкі з Беларусі пасажырскай і дарожна-камунальнай тэхнікі.
У цяперашні час таксама разглядаюцца перспектыўныя кааперацыйныя праекты паміж Беларуссю і Ліпецкай вобласцю ў сферы машынабудавання.
«Ліпецкая вобласць асаблівая для нас, і Губернатар дастаткова часты госць у нашай краіне: была адпаведная сустрэча з Кіраўніком дзяржавы, былі вызначаны прыярытэты ў супрацоўніцтве. Сёння мой візіт таксама носіць прадметны характар. Мы з Губернатарам дамовіліся сфарміраваць дарожную карту з тым, каб за кожным пытаннем супрацоўніцтва быў вызначаны канкрэтны выканаўца», – пракаментаваў сустрэчу Аляксандр Рагожнік.
Таксама падчас візіту ў рэгіён Пасол Беларусі ў Расіі наведаў Асаблівую эканамічную зону «Ліпецк», прамысловыя прадпрыемствы рэгіёну, усклаў кветкі да стэлы «Горад воінскай славы» ў г.Ельцы.
